Santi Fernandez

Iniciei a miña traxectoria culinaria dende moi novo, comezando a traballar primeiro no restaurante da miña familia e despois cursando estudos na Escola de Hostalería de Santiago de Compostela. Tiven a sorte de ampliar e enriquecer a miña formación en restaurantes recoñecidos e galardonados con estrelas Michelin como Toñi Vicente, Paolo Petrini en París, Hakkasan en Londres ou Tristán en Puerto Portals. A miña formación hoteleira quedou sólidamente cimentada en hoteis exclusivos e establecementos Relais & Châteaux como El Castell de Ciutat en Seu d'Urgell ou o Hotel Principe di Savoia en Milán.

O meu apaixonado desexo de exploración e excelencia profesional levoume a traballar e liderar proxectos culinarios nunha singladura por diversos países, incluíndo Alemaña, Francia, México e Rusia, antes de pasar unha longa estancia de máis de doce anos en Australia. No país austral, primeiramente, encargueime das cociñas do restaurante Sault en Daylesford, onde deixei unha pegada significativa na escena culinaria ao ofrecer unha cociña de mercado e vangarda na que os produtos locais eran tratados con sinxeleza e respecto.

Anos máis tarde, únome como xefe executivo ao restaurante Voyager Estate. Un establecemento enclavado no medio dun dos mellores viñedos da impresionante rexión vitivinícola de Margaret River, cuxa adega produce viños premium de clase mundial. O restaurante recibiu durante a miña estadía importantes premios e recoñecementos gastronómicos a nivel nacional, erguéndose como un destino obrigado para amantes da boa mesa e coñecido polos seus menús degustación hiperestacionais e de maridaxe, onde o viño era o fío condutor.

No 2022, e xa con case 30 anos de experiencia contrastada no sector hostaleiro e cunha bagaxe en diversos establecementos a nivel nacional e internacional, tomei a decisión de emprender unha nova aventura profesional ao fundar Terra Food Solutions para poder ofrecer servizos de consultoría a empresas do sector.